А.Жумабаев: «Сары-Колум»

Канча кылым жашаган,

Кадыры бар Сары-Колум.

Тоосу түзү аралаш,

Адыры бар Сары-Колум.

Асылын айтып ырдашка,

Акыны бар Сары-Колум.

Тамашалуу күйдүргү,

Мазагы бар Сары-Колум.

Сыйынсаң шыпаа таптырган,

Мазары бар Сары-Колум.

Кышкы суугу кыйнаган,

Азабы бар Сары-Колум.

Тоонун башын Тооруган,

Булуту бар Сары-Колум.

Кыргыз тажик аралаш,

Улуту бар Сары-Колум.

Журттан чыккан өзгөчө,

Сулуусу бар Сары-Колум.

Түбөлүктүү түгөнбөс,

Мөңгүсү бар Сары-Колум.

Топоз кою жай алган,

Өндүрү бар Сары-Колум.

Кара шагыл көк шибер,

Өң-түсү бар Сары-Колум.

Аркар-кулжа аралаш,

Кийиги бар Сары-Колум.

Асман болжоп шаңкайган,

Бийиги бар Сары-Колум.

Чектештирген көп жерди,

Түйүнү бар Сары-Колум.

Аска тоолуу түзөңдүү,

Жерлери бар Сары-Колум.

Аркар атып эт берген,

Мергени бар Сары-Колум.

Акылы даана ичи тар,

Элдери бар Сары-Колум.

Уюлгутуп сапырган,

Шамалы бар Сары-Колум,

Кара куурдак каттама,

Тамагы бар Сары-Колум,

Узакка кетсең сагынтар,

Карааны бар Сары-Колум.

Сүйлөсө тилден бал тамган.

Чечени бар Сары-Колум,

Күйдүргү сөздүү мыскылчыл,

Эчени бар Сары-Колум.

Төрткө кирип кас турган,

Бечели бар Сары-Колум,

Бетегеси буралган,

Төрлөрү бар Сары-Колум.

Too курчанып токтогон,

Көлдөрү бар Сары-Колум.

Толкутуп жүрөк туйлаткан,

Мөлмөлү бар Сары-Колум,

Куйкалаган жүзүңдү,

Ысыгы бар Сары-Колум.

Оюн-зоок тамаша,

Кызыгы бар Сары-Колум.

Толукшуган жылдыздуу,

Гүл кызы бар Сары-Колум.

Кышкы суугу тоңдурган,

Аязы бар Сары-Колум.

Аралары ат чабым,

Талаасы бар Сары-Колум.

Ырга ыргак кошорго,

Авазы бар Сары-Колум.

Күнгөй менен бетме-бет,

Тескейи бар Сары-Колум.

Алоолонткон очокту,

Терскени бар Сары-Колум.

Алла оңдосун ишиңди,

Кел-кели бар Сары-Колум.

Абдыкаар Жумабаев

Мургаб району

05.08.99 ж.