Замандаш бирге өскөн курбуларым,
Сагынгандан ойлонуп ыр курадым.
Элим алыс, жерим алыс көчүп кетип,
Сагынып санаа тартып буркурадым.
Жакут көз жадыраган бой тумарым,
Жүрөгүм жаралаган ой туманым.
Бахбур-Ата, Ак-Суудай асыл жерим,
Сагынып санаа тартып отурамын.
Чеш-Дөбө, Мадиянда Ыс - булагым,
Чындап көңүл кубанып шат кыламын.
Үч-Колдун, кең Алчордун талаасындай,
Бала кезди ойлонуп каткырамын.
Достор кайда, мен кайда, кыздар кайда?
Доор өтө турбайбы ушундай да.
Айланайын досторум сагындым мен,
Кең Мадиян, Жаман-Тал узун сайда.
Ак өргөөнүн түндүгүн тартып коюп,
Ак кымызды ичелик ысык жайда.
Айланайын асылкеч курбуларым,
Көрүшөбүз эми биз качан, кайда?
Халил Мурзахматов
Мургаб району