Эстейм сени өтүп кеткен балалык
Кайра келчи бир моокумдан каналык
Баарыңарды көз алдымдан өткөрүп
Эстөө үчүн болуп келем убакыт
Кайдасыңар классташтар алтындар
Силерди эстеп сагынууга акым бар
Тагдыр буйруп алыстыкта турсам да
Силерди ойлоп жаза турган ырым бар
Менин ырым силер үчүн арналат
Балалыкка тартып мени баратат
Бирок алыс тээ алыста ыраакта
Күңүрт болуп араң эле байкалат
Жакшы өттү менин алтын балалыгым
Жаз гүлүндөй жайнап турган убагым
Баарыңарды уюштуруп даярдап
Классыбыз алдыда жүрдү дайым
Конкурстарда биринчи орун алчу элек
Абдан жакшы даярданып чыкчы элек
Ошондо биз балдар кыздар баарыбыз
Кандай сонун ынтымактуу дос элек
Коштошуп биз онунчуну аяктап
Эң бир жакшы класс элек байкасак
Коштошуу кечесин да өткөрүп
Ар кимибиз ар кай жакка тарадык
|
II
Баарыңарды эстеп эстеп сагынам Балалыгым көргүм келип зарыгам Тээ алыстан кылт этип бир көрүнүп Узап кетти балалыгым сагынткан
Эсте калган окуучулук убагым Сонун өткөн ошондогу курагым Баарыңарды көргүм келип ансайын Эстей берип ичим бышып турамын
Чачтарыбыз агарып булут чалган Каарылык да астыбызды тооруп алган Элүү жаш бир карасаң экинчи өмүр Баш багып чыгып турган булуттардан
Элүү жаш баарыңарга куттуу болсун Ар бир үйгө бакыттын күшу консун Неберелер оюн куруп шаңга бөлөп Кубанычтар ар бириңди коштоп жүрсүн |
III
Сагынган сагынычтуу балалыгым Небере кыялынан жолуктурдум Өзүмдүн балалыгым күндө көрүп Неберелер күлкүсүнө канып турган
Баарыбыз чоң энебиз чоң атабыз Кээ бирлер таяэнебиз таятабыз Кудай буйруп кут болсунчу ушул курак Небере күлкүсүнө калып турган
Кайда жүрсө досторум аман болсун Бактылуу каарылык дөөлөт консун Ар бириңдин тилегиң ишке ашып Аллахым ар убакта колдоп турсун
Тагдыр буйруп жолугушчу жолдор бар Бул жалганда табышмактуу сырлары бар Ар кимибиз ар кай жакта жүрсөк да Жолугушуп чер жазышчу күндөр бар |
Мургаб шаарчасына караштуу В И Ленин атындагы орто мектебинин
1983-84-окуу жылындагы 10А классынын бүтүрүчүлөрүнө арнаймын.
Эркеайым Мамытова
Мургаб-Бишкек