Мажит Жакыпов: "Мургабым"

Мургабым


Чаңкасаң мүрөк сууларың,

Чабылдым сендеп дууладым.

Жашыл талды мындай кой,

Жактырам өскөн куу талың.

Сансыз санаа менде азыр,

Сагындым сени Мургабым.


Өрөпкүп жаның демиккен,

Өзүңдөн өстүм алып дем.

Гүлдөрдүн түрү өзүңдө,

Гүлүңдөп баары сенде өскөн.

Ааламда жок сендей жер,

Айланам Мургаб жеримден.


Мактоого сени тилим кем,

Мал жаның оттоп бийиктен.

Жылдызга жакын карасаң,

Жылгасы толо кийиктен.

Бейпилдик болсун өзүңдө,

Берейин жаным тилип мен.


Сенде калган тууганым,

Сен деп жүрөт уулдарың.

Өзүңдөн алыс жүргөнгө,

Өзөгүм сыздап муңдамын.

Түгөнбөс кенчим мурасым,

Түбөлүк сенсиң Мургабым.


Абдижамил Примбердиев

www.sary-kol.ru

Дополнительная информация

Урматтуу окурман, эгер сизде да ушул сыяктуу элибизге, жерибизге байланыштуу материалыңыз болсо, тезинен дүйнө жүзү менен бөлүшүңүз. Биз кабарыңызды заматта жер жүзүндөгү мекендештерге жеткиребиз. Алар көрүп, окуп, сиздин кабарыңызга үн кошушат.


Кабарыңызды кыскача баяндап жана кабардын аудиосун, видеосун, сүрөтүн да кошуп Viber же WhatsApp аркылуу +79278161260 номерине жөнөтсөӊүз болот. Кабар сайтыбыздын "САРЫКОЛ КАЙРЫКТАРЫ" бөлүмүнө чыгат.