Аска тоолуу Памиримди сагындым,
Алыстаткан тагдырыма таарындым.
Алыс Чүйдү, Талас, Ошту айланып,
Арман жашым элүү ашып карыдым.
Бийик тоолуу Памиримди сагындым,
Билинбеген түйшүктөргө кабылдым.
Бийик жерден төмөн жерде кыбырап,
Бажырайган кары-жаштан айрылдым.
Эгиз бийик Памиримди сагындым,
Эли-жерим, тууган-урук жакыным.
Эсил элим, эсил жерим ой баскан,
Эмне деймин кайгы баскан тагдырым.
Күн да өтөт билинбестен айланып,
Куу турмуштун чылбырына байланып.
Кайгы түшүп кайран элим кор болуп,
Кайсы бирин, кайсы бирин айталык.